DIKIRA MALING SEPEDHA

HUMOR

DIKIRA MALING SEPEDHA

Ing sawijining awan aku nampa telepon saka Briptu Mulyadi, pulisi kenalanku sing dhinese ana Pos Pulisi kota ngarep pasar gedhe

"Mas, tindake rene. Penting. Iki ana wong konangan nyolong sepedha, jare kenal sampeyan?"

Kanthi kesusu, sepedha motor tak playokake menyang Pos Pulisi Kota. Tekan pos Pulisi aku njujug ruwangane Briptu Mulyadi. Saiba kagetku bareng aku weruh ana wong sing lagi diperiksa, sirahe tumungkul.

"Mas iki Iho malinge, apa panjenengan kenal?" mangkono pambagene Briptu Mulyadi. Bareng wong mau nyawang aku, aku mangsuli "Ya jelas kenal, iki kancaku kantor jenenge Kalyubi".

Bareng ditlesih-tlesih jebul kedadeyane mangkene. Dik Kalyubi mau pamit menyang pasar nyilih sepedhane kanca kantor, banjur dititipake ana ing penitipan sepedha. Nalika wis rampung keperluwane, dheweke njupuk sepedha. Nanging bingung, sing endi sepedha sing disilih mau amarga sepedhane jejer-jejer ana ing penitipan. 

Dhasar wektu semono sepedha ora dikunci, dheweke njupuk sepedha sing rumangsane sepedha silihane. Nanging sial, lagi wae nuntun sepedha arep digawa metu ndadak ana swara wedok bengok-bengok "Maling... maling. Maliiing" karo nudingi dheweke. Dheweke ora mlayu amarga ora rumangsa nyolong. Nanging banjur ana anggota pulisi sing nyekel dheweke, digawa mlebu ing Pos Pulisi.

Bareng kanca kantor sing sepedhane disilih dakundang neng Pos Pulisi, pranyata bener sing dijupuk saka penitipan mau dudu duweke, amarga sepedhane isih wutuh ana ing penitipan. Apa tumon, gara-gara kliru njupuk sepedha silihan, diarani maling. Beja wektu semono durung ana maling kecekel terus dimasa, digebugi.

(Supardi-Purin Kendal)

 
Sumber : Panjebar Semangat   No. 7 - 18 Pebruari 2012