BUBUR KETAN LERI

Humor

BUBUR KETAN LERI

Kedadeyan iki dumadi watara setaun kepungkur, mbeneri dina ulang taune anakku pas wulan pasa. Mulih saka sekolah kaya biyasane aku wis ibut neng pawon, masak sega lan nggawe jenang/bubur ketan kanggo mbancaki. Watara jam setengah 5, sega, bubur ketan sak santene wis mateng.

Dumadakan ana telepon saka kanca guru, ngabari yen ana wong tuwane kanca guru sing tinggal donya. Aku diajak nglayat bareng-bareng. Durung kober resik-resik, aku terus budhal nglayat, supaya ora kepalangan buka pasa. Semayanan karo kanca-kanca liyane. Santen tak lebokake kulkas. Sakdurunge budhal, kirim SMS pamitan marang bojoku.

Watara jam 6, aku wis bali. Tekan ngomah langsung dipapag pitakonane bojo lan anakku sing lagi buka.

"Bu, kena apa rasane bubur ketane kok aneh?" pitakone bojoku karo nuduhake bubur ketan campur santen ing piring sing ora entek olehe mangan.

Aku bingung. Kok rasane aneh kena apa ya? Tak rasakake, pancen bener aneh. Rasane kaya banyu leri.

Bareng tak genahake marang bojoku, tibake bojoku ora njupuk santen saka kulkas. Nanging nyidhuk saka baskom plastik sing isine banyu leri. Banyu olehku mususi beras kaya biyasane tak wadhahi baskom plastik, arep tak enggo nyiram kembang. Amarga mau kesusu arep nglayat, durung kober tak siramake kembang. Lah amarga peteng repet-repet, karo bojoku banyu leri mau dikira santen kanggo mangan bubur ketan. Mulane rasane kok aneh.

Apa tumon, mangan bubur ketan kok ora nganggo santen nanging nganggo banyu leri.

(Ninik Ernawati,S.Pd. — Surabaya)

Sumber : Panjebar Semangat   No. 7 - 18 Pebruari 2012