ANCER-ANCERE NGALIH

HUMOR

ANCER-ANCERE NGALIH

Gandheng bibit kang arep kakirim minggu iki akeh, mula aku butuh tambahan tenaga kanggo nyiapake. "Sudah tahu rumah pak Dulah?", pitakonku marang salah sijine stafku mbak Atu. 

"Belum pernah kesana pak, tetapi saya tahu ancer-ancernya dan bisa saya ke­sana kalau Bapak ada pesan. Jalan Demakijo kebarat ada bakul es angkringan, kebarat sedikit, lalu belok ke selatan 1 km sudah sampai pak." wangsulane

"Tolong mbak kesana, pak Dulah suruh bantu agar lusa bibit dapat dikirim ke Bali", kandhaku.

"Ya pak," kandhane, nuli budhal.

Tak enteni nganti sakjam, durung teka. Aku karo mbak Sandra nerusake nata bibit-bibit sinambi ngenteni mbak Atu karo pak Dulah. Jam 10.00 ateges wis 2 jam tetep durung teka. Mangka pangiraku paling suwe setengah jam kudune wis teka. Aku wiwit ora kepenak, mula mbak Sandra tak jak nusul..

Ringkese aku karo mbak Sandra wis tekan daleme pak Dulah. Kebeneran pak Dulah ana ngomah, lagi makani ayam. Tak takoni apa mbak Atu mau mrene, amarga tak kon marani, Dheweke kandha yen ora.

Aku sangsaya bingung, mula aku, mbak Sandra, lan Pak Dulah nuli bebarengan menyang dalan gedhe, saperlu nggoleki. 

Tekan protelon, aku dikagetake ana wong celuk-celuk kang ora liya mbak Atu. "Bapak, maaf saya mencari ancer-ancernya bakul es angkringan tidak ketemu. Saya sudah putar-putar berkali-kali. Di barat sana kira-kira 4 km ada pak, bakul es Angkringan, lalu saya belok keselatan 1 km seperti ancer-ancernya, tetapi tidak ada yang kenal pak Dulah", kandhane karo isih krenggosan semu dhongkol bareng weruh pak Dulah. 

"Wah ngapuntene mawon, bakul es angkringan dina niki mboten sadeyan. Saweg ngeteraken anake piknikan teng Parangtritis" kandhane pak Dulah kanthi lugu.

Kang dinggo pathokan ancer-ancer “bakul es angkringan”, rikala bakule ora dodol... ya bingung. Apa Tumon??

(Bambang Hadisutrisno- Yogyakarta)

Sumber : Panjebar Semangat   No. 7 - 18 Pebruari 2012